لو عايز تختصر كل كليات الجامعة ومعاهدها في قسم واحد هيكون بالتاكيد قسم الجغرافيا، علوم طبيعية موجود، دراسات بشرية ماشي،موضوعات اقتصادية شغال، علوم حاسب أكيد، علوم فضاء وأعماق بحار معانا، حفريات وشغل الدكتور هشام سلام ومالوا.
الجغرافيا بتهتم بخمس حاجات أساسية وهى : (1) الموقع بأنواعه، (2) والموضع بخصائصه الطبيعية والبشرية والاقتصادية، (3) والتفاعل بين الانسان والمكان اللى بيعيش فيه، وبينتج عن التفاعل دا إما حضارة أو خرارة ودا حسب نوع التفاعل إيجابي ولا سلبي مع البيئة، وبعدين (4) الحركة أى حاجة بتتحرك الجغرافي مبيعتقهاش حركة بشر حركة منتجات حركة أفكار، حركة تكاتك، بالمختصر كل الحركة المادية المحسوسة والحركة غير المحسوسة زى الاتصالات من صميم عمل الجغرافي، أخيرًا كل الدراسات بتتقولب فى (5) إقليم بيمثل خلاصة الجغرافيا؛ ودا يا إمام إقليم إدارى محافظة أو مركز، أو إقليم وظيفي زى القلب التجارى مثلا، أو حتى إقليم طبيعي.
الجغرافيا ببساطة علم معقد مركب متضخم زى الحاج اللى فى الصورة والتعقيد هنا مالوش علاقة بصعوبة الجغرافيا أو سهولتها ، لأ لأ دا ليه علاقة بارتباطها بالعلوم الأخرى زى ما صنّف الحاج أوجست كونت الله يرحمه العلوم لعلوم بسيطة وعلوم مركبة زى ما هنكتب فى منشور بعد كدا… لو كان فى العمر بقية

د / مختار الحسانين

رابط صفحته على الفيس بوك

https://www.facebook.com/profile.php?id=100022255245260

 

عن د.مختار الحسانين

دكتور مختار الحسانين. مدرس الجغرافيا البشرية في قسم الدراسات الاجتماعية بكلية التربية جامعة المنصورة، العمر 39 عامًا.